Close Window

DuCange, Glossarium mediae et infimae latinitatis (1883-7): VOCABULUM

VOCABULUM, Villa, praedium. Charta ann. 1064. apud Ughellum tom. 1. Ital. sacrae edit. ann. 1717. col. 534: Vendo et trado vobis a die presentis quoque modo de terra posita in Vocabulo, quod nuncupatur Caratioli cum ejus fine et mensura. Alia ann. 857. ibid. col. 753: Concedimus...... totam jam dictam civitatem,.... ac Vocabula circumquaque posita. Placitum ann. 1105. apud Le Blanc in Dissert. de Monetis pag. 62: Non omnis Italia, sed quaedam in ea loca sive Vocabula parti B. Petri Ecclesiae patrimonio fuerunt largita. Chron. Farfense apud Murator. tom. 2. part. 2. col. 535: Item Marco filius Ansefredi et Anna uxor ejus dederunt res suas territorii Sabinensis in Lejano super castellum de Cantalupo; et in alio Vocabulo, qui dicitur Mogianus. Rursum col. 592: Gregorius filius Rodulphi concessit in hoc monasterio res territorii Sabinensis, ubi dicitur Antiquus..... Rodulphus et Petrus filii Joannis concesserunt in praedicta ecclesia S. Angeli de Tancia res suas in eodem Vocabulo antiquo. Occurrit praeterea ibid. col. 538. 570. et 1003. Vide Vocatio 1.