Iulius_Paris_cps16, Epitoma, p9, 1HOME > 'praetor' in 'Iulius_Paris, Epitoma, p9, 1'
>>> Iulius Paris, Epitoma, p9, [cap. 2]hide dictionary links

[cap. 1]

DE IVDICIIS PVBLICIS

M. Horatius, interfectae sororis crimine a Tullo rege damnatus, ad populum prouocato iudicio absolutus est.

Cum a Libone tr. pl. Sergius Galba pro rostris increparetur, quod Lusitanorum magnam manum interposita fide praetor in Hispania interemisset, actionique tribuniciae M. Cato ultimae senectutis subscriberet, reus, nihil pro se recusans, filios suos populo commendare coepit, eoque facto mitigata contione absolutus est.

A. Gabinius, a C. Memmio accusatus, cum iam damnaretur, seruatus est: nam cum se filius eius Sisenna genibus accusatoris subiecisset, petens ueniam, repulsus ab eo, excusso etiam anulo, spectantes mouit, et ita dimitti Gabinium placuit.

App. Claudius, ob amissam classem infesto populo obiectus, cum effugere poenam nullo modo posset, beneficio subito coorti imbris dilato iudicio, postea non est accusatus.

L. Piso, a Pulscho accusatus, effuso subito imbri cum humi prostratus pedes iudicum oscularetur, os suum caeno repleuit; quod conspectum totam quaestionem ad clementiam transtulit.

Q. Flauius, a C. Valerio aedile reus actus, cum xiiii tribuum suffragiis damnatus esset, proclamauit se opprimi innocentem. Cui cum Valerius respondisset nihil sua interesse nocens an innocens periret, dummodo periret, ceterae tribus, motae insolentia hominis, Flauium absoluerunt.

C. Cosconium reum, Seruilia lege accusatum a Valerio Valente et iam damnationi propiorem, res una seruauit, quod poema accusatoris sui recitauit, in quo puerum ingenuum et uirginem ingenuam corruptos a se significabat. Quae res ut innocenti Cosconio peperit excusationem.

M. Atilium Calatinum, Soranorum oppidi proditione infamem, seruauit Q. Maximus socer, qui se adseuerauit si in eo crimine sontem illum deprendisset, dirempturum fuisse adfinitatem.

M. Aemilius Scaurus, repetundarum reus, propter uetustissimam nobilitatem et recentem memoriam patris absolutus est.

Cotta, a P. Scipione Aemiliano apud iudices ad populum accusatus, septies dilato iudicio, octauo absolutus est, ne uideretur populus damnato Cotta non iudicium secutus sed accusantis auctoritatem.

Calidius Bononiensis, in cubiculo mariti noctu deprensus, cum ob id adulterii diceret causam, adfirmauit se ob amorem pueri eius eo esse perductum. Confessio quamuis falsa profuit iuueni: nam absolutus est.

Cum parricidii causam duo Caelii dicerent, splendido Tarracinae loco nati, quod pater eorum Caelius in cubiculo quiescens, filiis in altero cubantibus lecto, erat occisus, postquam cognitum est illos aperto ostio inuentos esse dormientes, absoluti sunt.

L. Scipio post speciosissimum triumphum de rege Antiocho ductum, perinde ac pecuniam ab eo accepisset, damnatus est.

C. Decianus, cum P. Furium pro rostris accusaret, ausus de morte Saturnini queri punitus est.

Sex. Titius, uir populo gratus, quod Saturnini imaginem domi suae habuerat, oppressus est.

Claudia Appii soror, a ludis reuertens domum, optauit ut frater suus reuiuesceret saepiusque consul factus magnam urbis frequentiam minueret. Ob id accusata damnataque est.

M. Mundius Cn. Lollius L. Sextius triumuiri, quod ad incendium in sacra uia ortum extinguendum tardius uenerant, a tr. pl. damnati sunt.

P. Auilius triumuir a P. Acilio tr. pl. damnatus est, quod uigilias tardius circumierat.

M. Aemilius Porcina a L. Cassio multa adfectus, quod nimis sublimem uillam suam extruxerat.

Quidam pueri sui nimio amore correptus, rogatus ab eo rure ut omasum in cena fieri iuberet, bubula uenali non reperta, domito boue occiso desiderium eius explicauit, et ob id publica quaestione adflictus est.

Apud M. Popilium Laenatem praetorem quaedam, quod matrem interemerat, dicta causa absoluta est, quia constabat eam ueneno necatorurn liberorum dolore commotam, quos auia filiae infensa sustulerat.

Mater familiae Zmyrnaea uirum et filium interemit, cum ab his iuuenem, quem ex priore uiro enixa fuerat, occisum conperisset. Quam rem Dolabella, imperio Asiam obtinens, ad Areopagitarum cognitionem remisit, qui inspecta causa et accusatorem et ream post centum annos ad se reuerti iusserunt.


HOME > 'praetor' in 'Iulius_Paris, Epitoma, p9, 1'
574w 7.8682639598846 s